Mae Criw Celf yn brosiect ar gyfer artistiaid ifanc brwdfrydig a thalentog rhwng 9 a 18 oed sydd wedi’i gynllunio i feithrin talent ifanc yn y Celfyddydau Gweledol.
A hoffech chi weithio gydag artistiaid proffesiynol, ymweld â stiwdios ac arddangosfeydd, yn ogystal â chael y cyfle i arddangos eich gwaith yng Nghanolfan y Celfyddydau Aberystwyth, a datblygu eich portffolio celf? Os felly byddwch wrth eich bodd gyda Chriw Celf Ceredigion!
Mae’r gweithdai creadigol yn anelu at ehangu gwybodaeth pobl ifanc am gelf, eu dysgu i feistroli technegau newydd, arbrofi, magu hyder a datblygu eu hiaith weledol eu hunain.
Manylion Criw Celf 2024
Bydd ein rhaglenni Cynradd ac Uwchradd yn rhedeg yn ystod wythnos gyntaf gwyliau Haf yr ysgolion – dydd Llun 22ain – dydd Sadwrn 27ain Gorffennaf, 10.00am – 4.00pm
Gwahoddir ymgeiswyr o Flwyddyn 5 – 13 sy’n dangos diddordeb brwd yn y celfyddydau gweledol.
Codir tâl o £65 sy’n cynnwys costau’r holl weithgareddau, deunyddiau ac ymweliadau. Mae llefydd ar gael am ddim ar gyfer ymgeisiwyr llwyddiannus sy’n gymwys ar gyfer prydau ysgol rhad. ‘Rydym yn croesawu ceisiadau oddi wrth bobl ifanc o bob cefndir ac ‘rydym yn brosiect cyfleoedd cyfartal.
 Diddordeb?
Rhaglen Criw Celf
Gweithdai gydag artistiaid proffesiynol
Cyfle i ddatblygu eich portffolio celf
Ymweliadau â stiwdios artistiaid ac arddangosfeydd eraill
Digwyddiad gyrfaoedd yn y celfyddydau
Cyfle i arddangos eich gwaith yng Nghanolfan y Celfyddydau Aberystwyth
